Te Ches Gali, Mnas Bari... (2016)

Ապարանյան ազգագրական երգերը ոչ ավանդական մշակմամբ հանդիսատեսին նորովի մատուցելու գաղափարը միավորել է «Հովեր» պետական կամերային երգչախմբին եւ «Վահանգն Հայրապետյան» տրիոյին։ «Արամ Խաչատրյան» համերգասրահում տեղի է ունեցել նոր խմբերգային «Թե չես գա-լի, մը-նաս բա-րի» խորագրով համերգը։ Երգերն ընտրված են Ալինա Փահլեւանյանի ժողովածուներից, մշակումները կատարել է Վահագն Հայրապետյանը: Ինչպես նշել է «Հովեր»-ի գեղարվեստական ղեկավար եւ խմբավար Սոնա Հովհաննիսյանը, նախագծի համար ընտրել են Ապարանի երգերը, քանի որ այն համարվում է Հայաստանի ամենաերգեցիկ շրջաններից մեկը.«Կոմիտաս վարդապետն Ապարանում է ձայնագրել «Մոկաց Միրզա»-ն, «Սասնա ծռեր»-ի հինգ տարբերակները։ Հնչում են ոչ այդքան հայտնի երգեր, քանի որ նպատակ ունեինք թղթի վրա մնացած այդ երգերը եւս հայտնի դարձնել։ Պատկերացրեք՝ կայացավ 100-ից ավելի տարի առաջ ստեղծված երգերի ու մեր հանդիպումը։ Երգերը միայն երգ էին, իսկ Վահագն Հայրապետյանը դրանք դարձրեց երաժշտություն. երախտապարտ եմ ինձ տակնուվրա անելու, հրաշալի երաժշտությունը նվիրելու համար։ Վահագ ջան, մտքիդ մեռնեմ»,- բեմից ասել է Սոնա Հովհաննիսյանը: Վահագն Հայրապետյանն էլ պատմել է, որ ապարանյան երգերի համն ու հոտը պահպանելով, նոր մշակում է արել.«Այս երգերը ռիթմիկ եւ ներդաշնակ կառուցվածք ունեն, պարզ մեղեդիներ են, փորձել եմ շատ չփոխել, պարզապես այդ ամենին ժամանակակից երանգ է հաղորդվել` ներդաշնակ ռիթմերի ու իմպրովիզացիայի շնորհիվ: Չեմ ցանկանում այդ ամենը կապել ջազի հետ, որովհետեւ այսօր, երբ մի բան են փոխում, անունը ջազ են դնում: Սա պարզապես ավանդական երգերի ոչ ավանդական ներկայացում է»։

Согласен. Интересная музыка.